قالوا إنك تحب وقلت ليه السـؤال؟ كل شخصٍ يحب وكل شخصٍ يميــل

والهـوى ديـرةٍ مابيــــن صــد ووصـال دوم فيـهـا نـزول ودوم فيهـا رحيـل

ياعرب والقلوب أشوفها بألــف حـال بين قلب جريـح وبين قلــــــبٍ قتيـــل

والا أنا لو باحب أحب بنــت الخيـال نادره ما لهـا بالنـاس شبـه ومثيـل

فاتنـة ناعمـة فيهـا هدوء ودلال حاويــة كـل زين وكــــل طبعٍ أصيل

من يعرف الجمال يقول هيّ الجمال وصفها في قصيدي يشبه المستحيـل

كن في وجهها صبحٍ ضحك لي وقال: يا صبـاح المحبة مـــن خليـل لخليل

وكـــن في عينهـا رمــشٍ ينادي تعـال واعذابي من الرمش الكسول الكحيل

شعرها ليلٍ أسود فيه صمت وجـدال إن تحرك يضيع الصبح بأطــــراف ليـل

إن تناثر جديلـه من يمين وشمال ضمني في بياض الصدر تحت الجديــل

والشفايف مثل جمرٍ يزيـد اشتعال ودي أضـمّ جمره لين أشبّ الفتيل

إن مشت كنها غصنٍ مع الريح مال هزّه الشوق من فوق خصرٍ نحيل

كن فيـها رسوخٍ علّته الجبـال وكن فيـها شموخٍ علّمته النخيـ

تجمّع الكل فيها مـــن جمال الخصـل بنت قلبٍ رشيد وبنت عقلٍ ثقيل

كاملة والله اللي يستحق الكمال صــــورةٍ كل ما فيها فريد وجميل

يعجز الشعر عنها حتى لو في الخيــال كنه يقول يا ناصر ترى مستحيــل